Shure-Shure wakar Nasir Usman Babaye

Amshi:
Gun shiga kin zarce amare,
Kar ki sa in ta shure-shure.

1  Na fada maki Kar ki mance,
Kar ki yi Mani kauce-kauce,
Sai na zamto abin kwatance,
Ko mutane su gan ni  bare.

2  Kar ki yi mani zille-zille ,
Ba ni son ki da tsalle-tsalle,
Kar magauta su min kwalele,
Duk katangu na kinsu ture.

3  Duk kalaman zugarsu jure,
Ba su kaunar su gan mu tare,
Ni da ke so suke mu Ware,
Sai su rinka kiran gwagware.

4  Da kinai mani girke-girke,
Su gurasa tuwo da Buske ,
Sai na ci su kwarai da gaske,
Har ki sanya miya ta sure.

5  Kar ki manta fadar mutane,
Harshe har da hakori manne,
Sai su Saba abin hakan ne,
Har ta kai su da ture-ture.

6  Nai tunanin abinda ke sa,
Gingimemen dutse ya nisa ,
Yau da gobe tana a kansa,
Wataran Sai ki gan shi dare.

7  Kar ki yarda da ce -kucensu,
Aniyarsu kwa za ta bi su,
Ba su samun abin nufinsu,
Sun ki, so za su gan mu tare.

8  Sun fi ganewa zunde-zunde,
In ka ba su na tande-tande,
Sai su ba ka batu a murde,
Kai Ka afka cikin kirare.

9  In kwa kin biyewa batunsu,
Sharrikansu da ke asusu,
Za su bude su tankado su,
Dai da dai za ki gan su Jere.

10  Daga nan kwa Sai sake -sake,
Lamuranmu duka su sarke,
Sai ka ce masu zuke-zuke,
Mui ta Kara kama ya gyare.

11 Sai mu koma da rabe-rabe,
Tsare -tsarenmu sai su kwabe,
In na zo da kure ki karbe,
Mashahuri ya bi darare.

12  Shi tunani yana da tushe,
Hankali ke masa hasashe ,
Duk fushi sai ya zam a karshe,
An yi dace da gyare-gyare.

    Nasir Usman Babaye 07033729220