Wakar 'Ruɗun Zamani' na Musaddam tare da Zahra

Ruɗun Zamani rubutaccen waƙe ne da Musaddam Idriss Musa suka rubuta a matsayin waƙar haɗin gwiwa shi da Zahra SQ a watan Nuwamban shekarar 2020

Sunan waƙa: RUƊUN ZAMANI

*Zahra:*

Bismika Sarki Gwani

Tabara yo mana lamuni

Mu waƙe wannan zamani

Dake tsaka na hatsaniya.

*Musaddam:*

Yau duniya ta birkice

Ga al'umma sun haukace

Duk hankali nasu ya ɓace

A gurin biyewa zuciya.

*Zahra:*

Mun biyewa so na rai

Wanda ke janyowa kai

Tsangwama har ma a kai

Mu zamma tamkar mujiya

*Musaddam:*

'Yan uwa mun kaurace

Gun mu sun zama tarkace

Ba zumunci ya mace

Mun kauce hanyar anbiya

*Zahra:*

Ba maza yau ba mace

Gulma har da su yafice

Ba guda wanda za a ce

Ya ci a yi masa kariya.

*Musaddam:*

Ya kamata kwarai a yau

Ayyukan kirki mu hau

John, Madina, Ari, Barau

Kafin barin mu na duniya.

*Zahra:*

Rabbi mai ji mai gani

Wanga ruɗun zamani

Dake ta bin mu dare, wuni

Sa muke ta yi masa turjiya.